Gikatahong dili na patulan sa Office of the President ang mga pasingit ni Bise Presidente Sara Duterte atol sa iyang press briefing batok kanila.
Matod ni Presidential Communications Office Secretary Cesar Chavez, nga dili moluwat og pamahayag ang Palasyo kalabot sa mga pagpangatake ni Bise Presidente Sara Duterte.
Nasayran nga hait kaayo ang mga pulong nga giluwat ni VP Sara sa iyang sitdown interview batok kang Presidente Bongbong Marcos ug sa iyang pamunoan sa nasud.
Apil na niini ang iyang paghulagway sa naglingkod nga Presidente nga ignorante, ug ang Pilipinas anaa na sa “dalan sa impyerno”.
Gipaambit usab sa Bise Presidente sa iyang presson nga iyang gihulga si Senador Imee Marcos sa ilang group chat nga kon dili mohunong ang iyang kampo, iyang kawton ang patayng lawas ni Ferdinand Marcos Sr. sa lubnganan sa mga bayani ug ilabay sa West Philippine Sea.
Gitubag usab sa Bise Presidente ang ‘deception’ nga giingon sa Presidente, human gipangutana sa usa ka interbyu sa Lao kung unsa ang iyang kinaiya sa pamahayag ni Sara nga dili sila higala.//
Kahinumduman nga nabungkag ang uniteam tandem ni Presidente Marcos ug VP Sara, human ni-resign ang Bise Presidente sa gabinete niadtong Hunyo.
