CEBU – Gikatakdang pasakaan ug kaso ang managsuon kinsang nagpagukod sa kapulisan sa dakbayan sa Naga nga nagpahigayon ug checkpoint pasado alas 9 kagabii, Hulyo 20.
Giila ang managsuon nga sila si William Cabigas Lapasaran, 42 anyos, minyo ug si Roel Cabigas Lapasaran, 36 anyos, adunay kapuyo ug pulos mga taga Zaragosa, lungsod sa Aloguinsan.
Basi sa report sa kapulisan, nagpahigayon kini sila ug checkpoint sa dihang kalit lang nga misibat ang mga dinakpan sakay sa usa ka motorsiklo hinungdan nga dali kini nila nga gigukod.
Sa ilahang paggukod, natumba ang duha ka mga dinakpan pag-abot sa may Barangay Poblacion, lungsod sa San Fernando hinungdan sa ilahang pagkasikop.
Sa pakighinabi sa Bombo News Team kang Roel Lapasaran, giangkon niini nga paingon sila sa Barangay Bulacao, syudad sa Sugbo arun nga ihatud ang duha ka armas nga ilahang dala isip bayad sa iligal nga drogas.
Sa dihang gipangutana kung si kinsa ang nagsugo kanila sa paghatud sa mga armas, ingon man kung si kinsa ang ilahang hatdan, wala na kini muhatag pa ug detalye.
