Miduyog sa Kapitolyo sa lalawigan sa Sugbo ang mga opisyales sa Mandaue Chamber of Commerce and Industry (MCCI) alang sa pagpadayon sa Sugbo Negosyo Season 3 program kagahapong adlawa sa Huwebes, Mayo 29, 2025.
Kun diin gisugat ni Outgoing Cebu Provincial Governor Gwendolyn Garcia ang mga opisyales sa MCCI nga gipangulohan sa president niini nga si Mark Anthony Ynoc uban ang mga President-Emeritus nga sila Steven Yu ug Kelie Ko.
Ang kasamtangang season sa Sugbo Negosyo kay nagtanyag og P1-milyones para sa grand prize winner diin ang mga qualified beneficiaries kay gi-scan ug gipili sa mga nagkadaiyang buhatan sa Cebu Provincial Board Members ug sa buhatan sa Bise-Gobernador.
Ang mga benepisyaryo kay nakadawat sa ganti isip initial capital niini nga P20,000 nga nagtumong sa pagpalambo sa ilang mga nagkadaiyang patigayon.
Gani ang ikaduhang tranche sa maong programa kay nagganti og P30,000 nga gamiton para sa pagpamalit ug dugang ekipo sa mga gagmayng negosyante samtang ang final tranche kay nagbalor og P150,000 alang sa product development ug business expansion.
Sa kinatibuk-an, adunay P200,000 ang mahatag ang maong programa sa mga benepisyaryo niini pinaagi sa mga QR-coded cards kun diin ilang magamit sa pag-redeem sa mga pre-approved items nga kasosyo sa Kapitolyo.
Kini agig pagsiguro nga magamit sa saktong tumong ang pundo sa programa para sa mga gagmayng tigpatigayon.
Ang programa kay gipundohan sa Kapitolyo og P100-milyones pinaagi sa napasar nga annual budget niini.
