CEBU CITY-Gikatakdang mopasaka og 3,200 porsiyento ang market value sa mga pipila ka dagkong mga dapit sa dakbayan sa Sugbo tungod sa gisugyot nga rebisyon sa real property tax (RPT) code sa syudad, nga makakolekta og dugang nga buhis.
Nasayran nga human kini gi-veto ni Cebu City Mayor Michael Rama, ang 2022 Real Property Tax Code niadtong Pebrero, nga giaprobahan sa Cebu City Council niadtong Disyembre 30, 2022, hinungdan nga giduso ang Local Finance Committee og laing bersyon sa rebisyon nga giulohan sa 2023 Real Property Tax Code sa Sugbo.
Apan, sa pakighinabi sa Bombo Radyo Cebu News Team sa Bise Mayor nga si Raymond Garcia diin gi-klaro niini nga dili tibuok Cebu ang maapektuhan sa 3,200% ug dugang pa sa Bise nga anaa lang gani kini sa 100-200% nga pag-usbaw.
Sa laing bahin, gi-uyonan ni Garcia ang naasoy nga pagpa-umento tungod sa pila na katuig ang milabay sukad sa ulahing natala nga pagpausbaw.
Sa pagkakaron, anaa na sa proseso ang gisugyot nga rebisyon ug gilauman nga sunod tuig 2024, aduna nay kalamboan sa ilahang gisang-at nga pagpasaka sa market value.
