CEBU – Gikumpirmar ni Cebu City Vice Mayor Michael “Mike” Rama nga nagtagbo sila ni Presidente Rodrigo Duterte sa kauluhan kagahapon sa gabie ug gituki niini ang mga hisgutanan sa nasod ug sa syudad sa Sugbo, apan sa pakighinabi niini sa Bombo Radyo Cebu, gibutyag ni Rama nga dili na niini pa madetalye ang ilang giistoryahan sa Presidente.
Nasayran nga lakip usab nga present sa maong panagtagbo silang Executive Secretary Salvador Medialdea, Sen. Bong Go ug PNR General Manager Junn Magno.
Sa laing bahin gihimug-atan ni Rama nga mas mahinungdanon karon ang bayanihan o pagtinabangay ug dili matud pa magsige ug lingkod ug mangita ug problema.
Kini ang reaksiyon sa Bise Mayor sa kakuwang matud pa ug nurses ug mga boluntaryo alang sa pag administer sa bakuna. Segun sa opisyal nga angayang pangitaan ug solusyon ang problema diin positibo kini nga daghan gihapon ang buot magboluntaryo.
Samtang positibo usab kini nga adunay mga suplay sa bakuna pa ang moabot sa syudad sanglit daghan usab ang gikatakdang moabot nga suplay sa Pilipinas.
Ning kasamtangan adunay unom ka vaccination sites ang dakbayan sa Sugbo apan anaa sa 21 ka sites ang gihan-ay sa syudad diin 15 niini ang mamahimong kanunay nga operational samtang ang unom mao matud pa ang magsilbin ihulip sa mga i-disinfect nga vaccination sites.
