CEBU CITY-Mipasalig ang Globe telecom nga ila na karong paspasan og paningkamotan ang pagpakusog sa internet connection. Kini human usab nga gi call out ang maong telcom atol sa SONA ni Duterte niadtong Hulyo 27,2020 sa hapon.
Human usab niini mipagawas og statement ang globe nga musunod sila sa panawagan sa presidente.
Matud ni Patrick Steven F. Gloria ang Globe Director for External Affair sa dihang nahinabi sa Bombo Radyo Cebu atol sa tulumanong Zona Libre nga naka invest na sila og 1.2 billion dollars nga igahin alang sa infrastructure development alang sa cell sites ug fiber connection.
Kini gumikan usab matud pa ni Gloria nga mas misaka pa ang demand karon sa internet sa pag-igo sa Covid-19. Giangkon hinoon niini nga gamay lang ang cell site sa nasud ug kapin 3 mil ka tao matag cellsite ang mugamit sa koneksyon hinungdan nga hinay gyud kini.
Angayan matud pa nila karon nga pun-an ang cell site aron nga mabahin usab ang users ug maibanan kini ug mamahimo nga anaa nalang sa 500 o 700 users per cell site sama sa nasud nga Vietnam ug Japan.
Gipasalig usab ni Gloria nga kung kini mahan-ay na, mamahimo nga makatukod na sila og cell sites karong umaabot nga Disyembre ug mapaspasan na ang koneksyon sa internet.
‘Permit’
Mihangyo si Patrick Steven F. Gloria sa Local Government Units (LGU) ingon man sa National offices nga dalion unta ang paghatag nila og permit alang sa infrastructure sa mga cell sites aron nga mas mapalambo pa ang internet connection sa nasud.
Matud ni Gloria nga ang hagit nila karon mao ang paghuwat sa permit nga matud pa mulanat og 8 ka buwan ayha pa makompleto ug kung kini dugay marelease, madelatar usab ang pagtukod sa mga cell site.
Gipasabot ni Gloria nga mag-una sila sa barangay, sunod sa LGU ug dayon sa national offices.
Nasayran nga 25 ka mga permit ang kinahanglan sa Globe ug muagi pa kini sa makuting proseso hayan hangyo niini sa mga hingtungdang opisina nga maoy mulihok sa mong mga dokumento nga tabangan sila nga mas mapadali kini.
