Nag-isyu ang Senate Impeachment Court og subpoena alang kang Davao City Mayor Sebastian “Baste” Duterte, nga nagmando kaniya sa pagtambong sa impeachment trial sa iyang igsoon nga si Vice President Sara Duterte karong Setyembre 23.
Apil si Mayor Baste sa mga saksi nga gipadalhan og subpoena may kalabotan sa Article II sa Articles of Impeachment, nga naghisgot sa mga alegasyon sa dili masaysay nga bahandi batok sa Bise Presidente.
Sumala sa House prosecution panel, posibleng pangutan-on si Mayor Baste og impormasyon bahin sa Gencorp Industries, Inc.—usa ka kompanya nga nalambigit kang VP Sara—partikular na kung aduna ba kini mga transaksyon sa gobyerno sa Davao City atol sa iyang termino isip mayor.
Matod pa sa tigpamaba sa prosekusyon nga si Benjamin Tolosa Jr., mahimong ikonsiderar usab si Mayor Baste isip usa ka “hostile witness” kung ang iyang baroganan isip saksi supak sa interes sa prosekusyon.
Samtang, nag-isyu usab ang impeachment court og mga subpoena alang kang Atty. Ariel Ronquillo ug Rendell Sopeña aron motambong tali sa Septyembre 21 ug 23, samtang gimandoan usab sila si Mayor Baste, Atty. Gary Samonte, ug Police Major Jerickson Sangalang nga motambong sa Septyembre 23.
