Malipayong gipaambit ni Siaton Negros Oriental Mayor Cezanne Fritz Diaz atol sa pakighinabi sa Bombo Radyo Cebu Newsteam nga positibo ang mga tubag ni Timor Leste kalabot sa pagkasikop ni kanhi Negros Oriental congressman ug giilang terorista nga si Arnolfo “Arnie” Teves Jr.
Gidugang pa niini nga pipila na lang ka adlaw kay makabalik na sa Pilipinas ang kanhi kongresista.
Mao nga nalipay ang opisyal kay anam-anam na og kahurot ang oras ni Teves, iyang posisyon ilabi na nga dili na siya makalingkawas sa balaod ug mahatagan na og hustisya ang mga tawo nga iyang nabiktima.
Mapasalamaton si Mayor Diaz nga ang nasangpit nga kaso gitutukan sa National government, Department of Justice ug National Bureau of Investigation.
Kahinumduman nga si Teves ang gitumbok nga maoy utok sa Pamplona massacre niadtong Marso 4, 2023 gawas sa balay ni Gobernador Degamo nga nakaingon sa iyang hinanaling kamatayon ug laing siyam pa ka kinabuhi.
