CEBU – Gatosan ka mga barangay kapitan nga nitambong sa Liga ng mga Barangay sa Pilipinas yearend general assembly nakadawat og P200,000 nga kantidad sa mga proyekto matag usa isip ilang sayong pinaskohan nga regalo gikan sa Kapitolyo.
Nisaad usab si Gobernador Gwendolyn Garcia nga i-release ang P2 milyones nga balor sa infrastructure projects sa matag usa sa mga presidente sa Association of Barangay Captain (ABC) nga mitambong atol sa kalihukan nga gipahigayon niadtong Nobiyembre 29 hangtod 30 sa usa ka hotel sa Lahug, dakbayan sa Sugbo.
Dugang pa, nga di mominos 880 ka mga barangay officials ang nisalmot sa maong kalihukan.
Nagkanayon si Garcia nga nalipay siya sa gihimo sa mga presidente sa ABC sa miaging pag-apod-apod sa financial assistance atol sa 2019 general assembly kay ilang gigamit ang pundo alang sa mga proyekto nga molungtad og dugay, sama sa pagtukod sa ABC buildings.
Dugang pa niini, nga imbes mogasto og kuwarta sa pagpalit og mga gamit sama sa office supplies, monoblock chairs, tent, kitchen utensils, ug uban pa, ang mga infrastructure projects molungtad og dugay ug ang tanang konstituwente makabenepisyo niini.
