Padayon nga nakasinati ang daghang mga bata nga Palestinian sa Gaza, sa grabe nga kahuyang, hilanat, ug hapit walay sulod nga tiyan, lakip ang siyam ka bulan nga bata, nga nag-antos sa malnutrisyon sukad siya duha pa ka bulan ang edad ug karon nagtimbang na lang sa 5 ka kilo, sumala sa taho sa Associated Press (AP).
Ang maong 9 ka bulan nga bata, nga giila sa ngalan nga “Khaled,” kasamtangang gitambalan sa pangunang pediatric hospital sa Gaza, diin gitabangan siya sa mga doktor pinaagi sa feeding tube.
Apan matod sa iyahang inahan nga si Wedad Abdelaal, kulang pa ang suplay sa pagkaon ug tambal.
Tulo na ka bulan sukad gisirad-an sa Israel ang mga utlanan sa Gaza, ang pinakataas nga pagbabag sukad nagsugod ang gubat.
Sumala sa United Nations, labaw sa 80% sa mga lumulupyo sa Gaza karon nagsalig sa tabang, apan halos wala nay pagkaon nga nahabilin sa mga bodega, ug kadaghanan sa mga community kitchens ug mga panaderya sirado.
Kada adlaw liboan ka mga tawo, kasagaran mga bata, naglinya alang sa gamay nga kantidad sa pagkaon. Daghang mga sentro sa nutrisyon ang naguba usab tungod sa pagpamomba ug kakulang sa mga suplay.
Ang mga ospital halos dili makasunod sa gidaghanon sa mga kaso sa malnutrisyon.
Sumala sa UNICEF, kapin sa 9,000 ka mga bata ang natambalan tungod sa acute malnutrition karong tuiga, ug ang gidaghanon nagpadayon sa pagsaka. Adunay usab kakulang sa therapeutic nga pagkaon ug bitamina.
Tungod niini, daghang mga ginikanan ang nagpaambit sa limitado nga tambal aron lang mahatagan ang tanan nilang mga anak, bisan kung kini dili igo.
Ang ilang pangutana mao: kanus-a mahunong ang pagkuwang sa pagkaon sa ilang mga anak?
Subay niana, sumala sa World Health Organization (WHO), adunay usa ka tin-aw nga peligro sa daghang kagutom sa Gaza, ug kung wala’y aksyon nga himuon, milyon-milyon nga mga bata ang mag-antos o mamatay. (Bombo Irenr Ardiente)
