CEBU CITY – Giplanohan sa lokal nga kagamhanan sa dakbayan sa Sugbo nga ablihan ang mga buwangan, subay sa pagpaubos sa Alert Level 1.
Gibutyag ni Cebu City Councilor Joel Garganera, ang pangulo sa Emergency Operations Center (EOC), nga gimandoan kini ni Cebu City Mayor Mike Rama nga hinayhinayan na ug pangabli ang tanang mga aktibidad nga gitugot sa Alert Level 1, arun usab sa pagbalik sa ekonomiya sa syudad.
Matud sa konsehal nga sa pagkakarun gihan-ay pa ang mga guidelines nga gikinahanglan arun nga masiguro ang luwas nga subling pag-abli sa mga buwangan sa syudad.
Gitataw sa opisyal nga ang pipila sa mga lakang nga gikonsiderar mao ang pagpabakuna sa mga empleyado, bisita ug mga operator.
Apan iyahang gitino nga dili ‘full capacity’ ang makasulod sa mga buwangan ug gikinahanglan nga magsul-ob sa gihapon ug facemask.
Sa kasamtangan, ang syudad mupahigayon ug laing hugna sa inspeksyon una ipahibalo ang katapusang petsa sa pag-operate pagbalik sa mga buwangan.
Kahinumdoman nga gipaubos na sa Alert Level 1 ang syudad sa Sugbo, sugod niadtong nakalabay nga Marso 15 ug mulanat kini hangtud sa Marso 31.
