CEBU CITY — Gihimug-atan sa usa sa mga organizers sa community pantry sa Brgy. Guadalupe, dakbayan sa Sugbo nga tinuod nga bayanihan ang gipakita ngadto sa kinabag-ang publiko.
Kini human nga gihangop sa publiko ang maong inisyatiba nga gipasiugdahan sa Sangguniang Kabataan sa barangay ug One-Guadalupe Community nunot ning nasinating epekto sa COVID-19 crisis.
Matud sa organizer nga si Michael Quijada nga na-inspire lang sila sa community pantry sa kaulohan hinungdan nga nakahimo og susamang programa ug karon nakabase na sa lima ka mga stations ang ilang community pantry.
Abli gihapon ang ilang pantry alang sa mga modonar og hinabang ug sa pagpang-apudapud niini.
Walay kabutangan ang kalipay ni Quijada ug sa mga kauban niini sa Guadalupe Community Pantry human nga nitabang usab sa pagdonar ang mga kabus diin magdepende lang sa ilang kapasidad.
Hinuon nagpatabang sila sa mga sakop sa kapulisan alang sa pagtuman sa quarantine protocols sama lang sa physical distancing.
Dugang pa ni Quijano nga nagpatabang sila sa habig sa barangay alang sa mas hapsay nga pagpahigayon niini.
‘Ipatuman gihapon ang physical distancing ug uban pa’
Giklaro sa Department of Health (DOH)-7 nga ilang gihangop ang pagpaningkamot sa mga community pantries nga gipasiugdahan sa pipila ka mga nagpakabanang indibidwal sa komunidad.
Apan mipahinumdom gihapon ang ahensya pinaagi sa tigpamaba ug chief pathologist nga si Dr. Mary Jean Lorreche nga kinahanglang ipatuman ang quarantine protocols aron dili mosangput sa pagtinakdanay ang kalihukan.
Kini bisan pa man og nakita sa ahensya ang grabeng panginahanglanon sa mga kabus sama lang sa kakuwang sa pagkaon nga dala sa kastrikto sa quarantine measures.
Matud ni Lorreche nga kinahanglang hangupon tanan ang mga lagda sa kwarantina ning panahon sa new normal. ###
