CENTRAL VISAYAS-Nipahimangno ang Police Regional Office sa Central Visayas (PRO-7) ngadto sa mga sakop sa lain-laing militanteng grupo sa Sugbo nga dili i-apil ang mga menor de edad kon nagplano sila nga mohimo og mga protesta alang sa anibersaryo sa deklarasyon sa martial law.
Ang paghandum sa anibersaryo sa deklarasyon sa Martial Law sa Pilipinas nga gikatakdang mahitabo karong adlawa, Setyembre 21, 2023.
Subay niini, gipahimangnoan sa kapulisan ang mga civil society groups sa paggamit sa mga bata samtang nagpahigayon og mga demonstrasyon sa paghandum sa ika-51 nga anibersaryo sa Martial Law.
Apan una ng gipagawas sa tigpamaba sa PRO 7, Police Lieutenant Colonel Gerard Ace Pelare, nga dili magpanuko ang kapulisan sa pagdakop ug pagpasaka og kaso batok sa mga indibidwal nga modani sa mga menor de edad sa rally.
Dugang pa ni Pelare nga kon gani adunay masigpatan nga bata atol sa ilahang ipahigayon nga rally, protests, ug demonstrations, dili kini magduha-duha sa pagpasaka og kaso ubos sa Republic Act 7610.
