Gipasidunggan sa Kagamhanan sa Dakbayan sa Sugbo ang mga nagkadaiyang departamento, frontline personnel, support offices, ug mga dugay na nga kawani pinaagi sa PRAISE Awards 2026. Kini isip kabahin sa pagsaulog sa ika-89 nga Charter Day sa siyudad, aron hatagan og pag-ila ang ilang dedikasyon ug kugi sa serbisyo publiko.
Gisugdan ang programa pinaagi sa mensahe gikan sa Human Resource Development Office (HRDO) ug sa PRAISE Selection Committee, diin gihatagan og gibug-aton ang importansya sa pagmintinar sa excellence, integridad, ug propesyonalismo sa tanang buhatan sa gobyerno.
Personal usab nga nipahalipay si Cebu City Mayor Nestor D. Archival sa mga awardees, ug matod pa niya, ang paspas ug epektibong pagpangalagad sa katawhan posible lamang tungod sa sakripisyo sa mga empleyado.
Gihatagan usab niya og kadasig ang tanan nga ang matag kalampusan sa siyudad maoy bunga sa hiniusang paningkamot sa mga sulugoon sa lungsod.
Nagpaabot usab og mensahe ang Buhatan sa Bise Mayor nga nagsuporta sa mahinungdanong papel sa mga kugihan nga empleyado aron magpadayon ang kalamboan sa Sugbo.
Lakip sa mga gihatagan og pasidungog isip Outstanding Employees mao ang mga kawani gikan sa Frontline & Revenue-Generating, City Health Department, CCMC, CCTO, DPS, City Treasurer’s Office, ug uban pa.
Wala usab magpaikyas ang paghatag og Loyalty Awards sa mga kawani nga niabot na og 40 hangtod 45 ka tuig sa serbisyo gikan sa nagkadaiyang emergency hospitals ug mga departamento sama sa Engineering, Markets, ug Sangguniang Panlungsod Secretariat.
Ang PRAISE (Program on Awards and Incentives for Service Excellence) nagpabiling usa ka mahinungdanong inisyatiba sa dakbayan aron palig-onon ang kultura sa pagkamay-tulubagon ug paghatag og de-kalidad nga serbisyo ngadto sa mga Sugboanon.
