Nagpatuman ang tanang korte sa Pilipinas og upat ka adlaw nga on-site work ug usa ka adlaw nga work-from-home (WFH) sugod karung adlawa Lunes, Marso 9.
Kini nagsunod sa direktiba ni Presidente Ferdinand Marcos Jr. sa mga ahensya sa gobyerno nga mosagop og 4 ka adlaw nga workweek aron makunhuran ang konsumo sa lana taliwala sa epekto sa nagpadayon nga gubat sa Middle East.
Giklaro sa Korte Suprema nga labing menos 25% sa mga empleyado sa matag opisina o dibisyon, sumala sa gitino sa hepe sa opisina, kinahanglan gihapon nga mo-report sa trabaho sa Biyernes aron masiguro ang padayon nga operasyon.
Gipunting usab sa korte suprema nga ang bag-ong work arrangement dili angay nga hinungdan sa pagkansela o paglangan sa bisan unsang naka-eskedyul nga mga hearing, ug kinahanglan nga ipadayon sumala sa gimando sa korte.
Gimandoan usab ang mga korte nga mosagop sa mga pamaagi sa konserbasyon sama sa pagmentinar sa air-conditioning sa 24 degrees Celsius, pagpalong sa mga kagamitan sa opisina kung dili gamiton, pagkunhod sa paggamit sa mga elevator, ug pagpahigayon og mga miting online.
Ang Sandiganbayan ug ang Court of Tax Appeals wala gilakip sa bag-ong work arrangement.
