CENTRAL VISAYAS-Gipanghinaut ni Dr. Salustiano Jimenez, ang Regional Director sa Department of Education Central Visayas, nga adunay mapanday nga Teachers Protection Policy.
Matud pa, kung adunay Child Protection Policy, giingong gikinahanglan usab nga protektaran ang mga magtutudlo gikan sa mga pagpaka-uwaw ilabi na sa panahon karun sa social media, ingon man ang basta na lang nga pagsulong sa mga ginikanan sa tunghaan ug pakaulawan ang mga magtutudlo.
Sigon ni Dr. Jimenez nga sayang ang mga magtutudlo nga mosayo na lang og retire gumikan sa kahadlok nga dili unya maka-retire gumikan kay matangtangan og lisensya kung ireklamo sa mga estudyante o sa mga ginikanan.
Gihulagway niini nga lahi na karun ang mga estudyante, ingon man ang mga ginikanan, hinungdan nga maglisod na ang mga magtutudlo sa pag-disiplina, ug kung dili usab ma-disiplina ang mga bata, giingong ang magtutudlo sa gihapon ang sayop.
Hinuon, gitataw ni Dr. Jimenez nga wala gi-tolerate sa DepEd ang mga magtutudlo nga “below-the-belt” na nga mangasaba sa mga estudyante, ilabi na nga ipaagi sa social media.
Subay niini, gipahibalo sa opisyal nga nangita na sila karun og pamaagi nga matudloan usab ang mga teachers sa pagkontrolar sa ilahang mga kaugalingon ilabi na sa mga panahon nga hilabihan na ang ilahang kapungot.
