LAPU-LAPU CITY, CEBU-Kasagmuyo ang nabati ni Winston Casio, ang tigpamaba sa Presidential Anti-Organized Crime Commission (PAOCC), nga taliwa sa panawagan ni Presidente Ferdinand Marcos Jr., ngadto sa mga Local Government Units nga pahugtan ang ilang pagbantay sa ilang mga lungsod kabahin sa mga illegal nga kalihokan apan, daw nagpakabuta-bungol ang pipila niini.
Nunot kini sa pag-raid sa mga sakop sa National Bureau of Investigation Central Visayas (NBI-7) ug sa PAOCC sa usa ka hotel sa Barangay Agus, dakbayan sa Lapu-Lapu niadtong Sabado, Agosto 31, 2024 tungod sa giingong operasyon sa illegal nga Philippine Offshore Gaming Operator o kon POGO.
Uban sa maong operasyon ang mga personahe sa Department of Social Welfare and Development (DSWD) , Inter-Agency Council Against Trafficking (IACAT), Philippine Center on Transnational Crime (PCTC), Armed Forces of the Philippines (AFP), ug Bureau of Immigration (BI).
Kung diin, mokabat sa kapin 162 ka mga foreign nationals ang nasikop lakip niini ang mga Indonesian, Chinese ug Burmese nationals ug 10 ka mga Pinay ug mga bata ang na-rescue sa mga social workers gikan sa DSWD-7 sa maong establisemento nga giilang Tourist Garden Hotel sa naasoy nga lugar.
Gawas sa kasagmuyo, naguol usab kini gumikan sa pagtuo nga nasulbad na ang isyu sa gi-raid nga POGO sa Tarlac, Pampanga apan, kasagaran sa mga nadakpan sa Lapu-Lapu kay gikan sa pa Luzon nga mibalhin lang sa dakbayan.
Hinungdan nga nanawagan usab si Casio sa ubang agency nga mahimong pro-active ug dili lang kutob sa bulabog ang himoong, gani kasohan ang mga masikop ug ang mga langyaw kay kasohan sa immigration arun ma-deport.
