CEBU CITY-Nakakitag probable cause ang Cebu City Prosecutor’s Office sa pagpasaka sa mga reklamo batok sa unom ka respondents nga nalambigit sa F Cafe Bar and Restaurant incident nga naglambigit sa Michelin Star chef nga si Jason Atherton ug sa iyang anak niadtong gabii sa Disyembre 23, 2022.
Sa usa ka resolusyon nga gisulat ni Assistant City Prosecutor Misty Leah Escolar-Hupp, girekomenda ni Deputy City Prosecutor Maria Theresa Calibugan-Casiño ug giaprobahan ni City Prosecutor Licera Lofranco-Rabillas, ang unom ka respondents nga gihinganlan mao sila si Butch Prieto Soreno, Inaki Ramon Bernedo Ibarlucea, Jericho Leonardi Porras Bolongan, Richard Doncillo Cervantes, ug Doughlas Cervantes nga mag-atubang og tulo ka kaso sa kalapasan sa Sec. 10 (a) sa RA 7610 (Other Acts of Child Abuse), Sec. 4 kalabot sa Sec. 15 sa RA 11313 (The Safe Spaces Act) ug Article 265 sa RPC (Less Serious Physical Injuries); ug laing respondent nga si Disc Jokey Neil Verzosa Pepito tungod sa paglapas sa Section 10(a) sa RA 7610.
Ang desisyon nisuporta sa rekomendasyon sa National Bureau of Investigation (NBI) nga pasakaan og kaso ang mga respondents tungod sa mga buhat nga ilang nahimo nga nakalapas sa mga hingtungdan nga balaod, isip resulta sa ilang imbestigasyon.
Kahinumdoman, nga si Gobernador Gwen Garcia ang unang mibutyag sa publiko sa maong insidente sa dihang iyang gi-post niadtong Disyembre 28, 2022 sa iyang personal nga Facebook account ang taas ug detalyadong pagsaysay sa nahitabo niadtong gabhiona nga adunay kaubang selfie uban sa Michelin- Bituon nga chef nga nakaangkon og mga bun-og sa nawong.
Una nang gipahayag sa gobernador nga dili niya i-tolerate ang maong insidente nga mahitabo sa Sugbo, kay dako kini og epekto sa imahe sa Sugbo sa mga turista ug sa national ug international community.
