Nalangan og subra usa ka oras niadtong Sabado (oras sa Italya), ang mga tren sa Italy tungod sa gidudahang sabotahe, human nasunog ang mga kable sa tren atol sa Winter Olympics sa Milan ug Cortina d’Ampezzo sukad niadtong Pebrero 6.
Naapektuhan ang mga serbisyo tali sa Naples ug Roma, ingon man ang linya paingon sa amihanan sa Florence.
Gikondenar ni Transport Minister Matteo Salvini ang insidente ug nanawagan alang sa pagpanubag alang sa mga responsable, tungod kay ang ahensya nakaagom og susamang problema niadtong miaging Domingo.
“These are hateful criminal acts aimed at workers and at Italy, ingon ni Salvani.
“I hope that no one plays down or tries to justify these crimes which put lives at risk,” dugang sa opisyal.
Ang mga awtoridad karon nag-imbestiga sa giingong pagsunog sa mga kable sa usa ka bahin sa high-speed nga linya tali sa Roma ug Naples, ingon man duha ka posible nga mga kaso sa bandalismo sa kapital ug sa Florence.
Niadtong miaging Sabado, ang unang adlaw sa Winter Olympics, usa ka grupo sa anarkista ang miangkon sa responsibilidad sa usa ka pag-atake sa network duol sa Bologna.
Naguba ang imprastraktura sa riles, hinungdan sa pagkalangan og sobra sa duha ka oras sa mga serbisyo sa high-speed, Intercity, ug regional nga tren.
Nagpadayon ang mga imbestigasyon aron mailhan ang mga suspek ug malikayan ang dugang nga pagkabalda sa transportasyon samtang nagpadayon ang mga dula.
