Gipasidunggan sa Mandaue City Council ang babayeng miluwas sa duha ka iro atol sa sunog nga nahitabo sa Styro factory sa Barangay Guizo niadtong Miyerkules, Disyembre 10, 2025.
Giduso ang maong pagpasidungog gikan sa buhatan ni Mandaue City Councilor Jennifer “Jen” Del Mar ngadto kang Ei Mei Lee Chiu-Maningo tungod sa kabayanihan nga iyang gibuhat diin milanog kini tibuok nasud kay mi-viral sa social media ang video sa iyang pagluwas sa mga binuhing iro gikan sa ikatulong andana sa maong edipisyo.
Giilang pag-umangkon sa H&E Industries Inc. si Maningo diin niadtong higayona kay stay-in siya sa maong commercial esthablishment maong naa siya sulod mismo sa nasunog nga building niadtong higayona.
Gikatakdang imbitaron sa sesyon sa konseha sa kagamhanang dakbayan si Maningo sa musunod nga semana aron pormal nga itunol ang pasidunggog ngadto kaniya.
Daghan ang midayeg kang Maningo tungod sa pagbaton niini og kahait sa pangisip sa pagsalbar sab sa mga kahayupan atol sa makalilisang nga sunog.
