Nauyonan sa kadagkuan sa Cebu Normal University (CNU) nga i-demolish nalang ang nagtakilid nga 8-storey Academic Center for Arts and Sciences building (ACAS), kini human nga gideklara sa Cebu City Office of Building Official (OBO) nga dili luwas alang sa occupancy tungod sa kadaot nga nahiagoman niini nunot sa magnitude 6.7 nga linog nga niigo sa Amihanang bahin sa Sugbo niadtong gabii sa Setyembre 30.
Ang maong desisyun nitumaw human sa deliberasyon sa CNU admin, Technical Working Committee, CCDRRMO, ug sa OBO, diin human nakit-an ang grabe nga pagkilid ug dagkong liki sa mao nga building ug ang mga kalapasan sa building permit nga nagtugot sa CNU motukod ug 6-storey building apan nidugang pa kini og lain pang duha ka andana apil na ang roof deck niini.
Matud pa ni Dr. Daniel Ariaso, ang President sa CNU, nga ang mao nga lakang nagsiguro sa kaluwasan sa mga estudyante nga mogamit sa building, hinungdan nga magpadayon ang online classes sa maong unibersidad, nga gipanglantawan molanat pa hangtud sa pagtapos sa academic year.
Samtang, nagplano usab si Ariaso nga moduso ug rekomendasyon para sa pagpatukod ug bag ong 20-storey building earthquake proof nga mamahimong parte sa expansion sa mao nga tunghaan nga gitawag “CNU SMART University.”
Sa pikas bahin, gitun-an ni Ariaso ang posibilidad nga adunay mamahimo nga fact finding investigation may kalabutan na sa pagkatukod sa nitakilid nga ACAS building para masayran ang kamatuoran sa pagkatukod sa naasoyng estruktura, ug matubag ang kabalaka sa kadaghanan.
Nirason ug nihatag usab og pamahayag si Ariaso nga ang ACAS building natukod sa administrasyon sa iyang gisundan nga CNU President Filomena Dayagbil, ug mokantidad kini og 86, 555, 999.94 diin ang niimplementar niini mao ang DPWH og ang EG & I construction corp og nahuman niadtong 2023.
Sa pagkakaron, walay hingpit nga dugang detalye ang pamunoan sa CNU may kalabutan na sa pagkatukod sa ACAS building tungod kay matud pa ni Ariaso, ang DPWH ug ang contractor ra ang bugtong makahatag og igong tubag mahitungod niana.
Dungang pa ni Ariaso, plano nila nga magmugna og lain nga pagpulong diin ilang gipasalig nga adunay representate gikan sa DPWH ug EG & I Construction Corp. ang motubag.
