CENTRAL VISAYAS-Nasakmit sa mga operatiba ang 250 gramos nga gituohang shabu nga gibanabanang mobalor og P1.7 milyones gikan sa dinakpan nga suspek sa Barangay Punta Princesa, dakbayan sa Sugbo.
Ang mga sakop sa Regional Police Drug Enforcement Unit 7 maoy nangulo sa maong operasyon ug positibong giila ang suspek nga si alyas “Pikdot”, baynte tres anyos nga taga Katipunan Street, Barangay Labangon, dakbayan sa Sugbo.
Base imbestigasyon nga usa kini ka courier sa ilegal nga drugas sa bigtime personlaity diin maka-dispose og 250 gramos matag semana.
Busa, gidayeg sa Regional Director sa Police Regional Office 7 PBGEN ANTHONY ABERIN ang RPDEU 7 sa malampusong pagsakmit sa nahisgutang ilegal nga drugas nga nakaapekto sa suplay sa drugas sa Cebu City.
Matod pa niini, nga nagpabiling agresibo ug walay hunong ang ilang pakigbatok sa ilegal nga drugas sa Central Visayas diin giabagan sa BIDA Program ug sa 5-focused agenda sa PNP.
Subay niini, gipaambit ni Police Lt. Col. Gerard Ace Pelare, ang tigpamaba ni Police Brig. Gen Anthony Aberin diin nagkanayon nga sulod sa usa ka tuig moabot sa usa ka bilyon ang nakumpiskar nga kantidad sa ilegal nga drugas.
Gidugang niini nga kasamtangang anaa sa tracking ang buhatan sa PRO 7 alang sa new drug strategy arun hingpit nga matuldukan ang suplay sa mga drug traffickers.
