CEBU CITY- Anaa na sa 45 ang dance contingents ang nakaparehistro para sa umaabot Sinulog 2025 sa umaabot nga Enero sunod tuig.
Triple na kini kung ikumpara sa 14 lang nga misalmot sa nakalabayng kapistahan diin gipahigayon sa South Road Properties ubos sa kamanduan ni Dismissed Cebu City Mayor Michael Rama.
Ang kinatibuk-ang ihap kay miabot sa 45 diin 42 ang misalmot isip participants aron makadaug ug 3 ang guest contigents nga magpasundayag sa kapistahan.
Gilangkoban ang lineup sa mga dance contingents sa mga guest dance contingent nga gikan sa dakbayan sa Sugbo, Cebu Provincial Government, ug sa tanyag nga MassKara Festival sa Bacolod City, Negross Occidental.
Matod pa ni Jojo Labella, ang Executive Director sa Sinulog Foundation Incorporated kay pagasugdan ang parada sa mas sayo nga oras itandi sa naandan aron maka-accomodate sa mas daghang misalmot nga mananayaw nga dili kaabtan sa tungang gabii.
Samtang, wala pa gisapubliko ang routa sa parada para sa Sinulog 2025 kay padayon pa kining gisabutang sa Executive Committee sa kagamhanang dakbayan sa Sugbo.
Ingon man nga gipasabot sab ni Labella ang rason kabahin sa pagwangtang na sa Sinulog sa Lalawigan tungod kay nadesisyonan sa Kapitolyo sa Sugbo nga ilahos nalang sa Grand Finale ang presentasyon kay nahiusa naman ang Sinulog sa tuig 2025.
