Nakaplagang patay sa mga rescuers ang usa ka 16 anyos nga gikatahong namissing human na-anod sa grabeng bul-og sa tubig adlawng Lunes pasado alas 11 sa buntag sa Barangay. Usmad, Lungsod sa Argao.
Nailhan ang biktima nga si Russel Mocillos, 16 anyos, usa ka sakristan, ug residente sa barangay Tulic, Lungsod sa Argao.
Base sa impormasyon nga nakuha, pasado alas 3 sa hapon niadtong Sabado, nangaligo ang magbarkada kauban ang biktima human sa ilang pagpang taod ug mga tarpaulin, sa Bugasok falls, sa Barangay Conalum, ug kalit lang nga naabtan sila sa grabeng baha hinungdan nga wala makahaw-as ang biktima gumikan kay dili kini kabalo molanguy.
Gitaho sa mga awtoridad ang mao nga panghitabo hinungdan nga nagpahigayun og search and retrival operation ang Municipal Disaster Risk Reduction Management Office sa Argao, niadtong adlawng Sabado, ug nakaplagan ang biktima 3-kilometros gikan sa Bugasok Falls, nga nasangit sa sanga nga wala nay kinabuhi kagahapon, Lunes alas pasado alas 11 sa buntag.
Matud pa sa mga awtoridad nga ang kawalay koordinasyon sa mga biktima ngadto sa mga opisyales sa barangay maoy usa sa mga hinungdan sa mao nga insidente sanglit walay nakabantay sa mga bata samtang nangaligo sa nahisgutang sapa.
Sapagka karon, padayon pa gihapon ang imbestigasyon sa mao nga panghitabo.
