CEBU CITY — Mag-atubang og kasong swindling ang usa ka lalaki human nasikop sa Sitio Guadalajara, Brgy. Guadalupe, sa dakbayan sa Sugbo gumikan kay nagpakaaron ingon kini isip empleyado sa Visayan Electric Company (VECO) aron mangwarta.
Giila ang 28-anyos nga dinakpan nga si Raymond Samson, taga Brgy. Jugan, sa lungsod sa Consolacion.
Matud ni Police Master Sergeant Ronnie Nudalo sa Guadalupe Police Station nga midangop sa ilang buhatan ang pipila ka mga residente sa Guadalupe ug mireklamo kabahin sa modus ni Samson sanglit daghan kini og gi-demand nga kwarta.
Nahimong modus sa maong dinakpan ang pagbisita sa mga kabalayan ug magpaila nga taga-VECO aron ipahibalo nga ibalhin na ang metrohan bugti sa bayad.
Dugang pa ni Nudalo nga nagsuot pa ang dinakpan og reflectorized jacket nga adunay logo sa VECO ug nag-ID pa kini.
Nakig-alayon na ang buhatan sa VECO ngadto sa Guadalupe Police Station aron sa uban pang mga aksyon kalabot na sa pagkasikop sa nagpailang empleyado.
Mihangyo si Nudalo sa mga nabiktima sa nagpailang taga-VECO nga mopatim-aw sa buhatan sa kapulisan alang sa dugang pang mga legal nga lakang.
