CENTRAL VISAYAS- Gihatagan og Medalya ng Kadakilaan o PNP Heroism Medal si Police Patrolman Mark Gomer Ornopia, kinsang napatay nga pulis sa Danao City, Cebu sa dihang niresponde kini sa alarma sa armadong tawo ug gipusil sa nawng sa suspek.
Gawas sa medalya nga gitunol ngadto sa asawa ni Ornopia kay nakadawat usab og cash assistance ang iyang pamilya gikan sa mga dagkong opisyal sa Philippine National Police.
Kini ang gikumpirmar ni Police Regional Office 7 (PRO 7) Director Police Brigadier General Rederico Maranan human ang mga opisyal sa Philippine National Police nibisita sa haya ni Ornopia niadtong Martes sa buntag, Hulyo 1 sa Tabogon, amihanang Sugbo.
Gipangulohan ni PBGEN Maranan ang tribute ug gipadayag ang kinasingkasing nga pahasubo sa tibuok pwersa sa kapulisan, ingon man nga mipasalig usab siya nga adunay ubang tukma nga tabang ug benepisyo nga ihatag aron matabangan ang pamilya sa panahon sa ilang kasubo.
Ingon man nga ang Philippine National Police nagpabilin nga komitado sa pagpasidungog sa mga ‘fallen heroes’ ug pagsiguro nga ang ilang kabilin sa kaisog ug serbisyo kay magpadayon.
