CEBU – Dugang nga mga rebelasyon ang andam nga ipabuhagay sa nasikop nga CEO sa Shantal investment scheme sa proper court.
Gi-asuy ni Police Major Ronald Alan Tolosa, ang CIDG 7 chief, nga basi sa iyahang pakighinabi ni John Rafael Revilla, giingong andam kini nga atubangon ang mga ‘consequences’, ingon man ang pagbutyag niini sa tinuod nga nahitabo.
Matud ni Police Major Tolosa nga mi-anhi sa Sugbo si Revilla gumikan kay nahadlok kini sa iyahang seguridad ngadto sa General Santos City human nga gipahunong ang ilahang operasyon.
Dugang pa niini nga mipadayag si Revilla nga wala kini plano nga palapdan ang ilahang negosyo dinhi sa Sugbo gumikan kay nasayod kini sa ‘stoppage’ sa ilahang investment scheme.
Giingong mihimakak usab ang dinakpan nga nagdala kini ug kwarta dinhi sa Sugbo gumikan kay ang mga parente niini ang naghupot sa kwarta ug gani aduna pa’y nahitabo nga mismanagement human nga gisudlan na ug personal interest sa iyahang mga kabanay ang maong negosyo.
Subay niini, giawhag ni PMaj. Tolosa ang publiko, ilabi na niadtong mga nabiktima sa Shantal investment scheme, nga mupatim-aw sa ilahang buhatan alang sa dugang nga kaso nga ipasaka batok ni Revilla.
