CEBU-Giklaro sa buhatan nga National Bureau of Investigation (NBI) nga ang pagsakmit sa mga depleted uraniums nga unang gikataho nga nahitabo sa dakbayan sa Mandaue kay nahitabo diay sa dakbayan sa Sugbo ug Talisay.
Kini ang gitino ni Agent Arnel Pura, ang labaw sa NBI Cebu District Office nga matod pa nga ang uraniums kay nasakmit atol sa mga operasyon sa dakbayan sa Sugbo ug Talisay ug dili sulod sa dakbayan sa Mandaue niadtong Nobiyembre 8 ug 9.
Giklaro pa ni Pura nga ang operasyon gihimo sa composite team, apil na ang mga buhatan sa NBI gikan sa Manila, Cebu ug Mandaue.
Positibo sa Uranium-238 ug Uranium-235 ang 60 kilos nga radioactive materials nga nasakmit unta sa mga awtoridad.
Sa laing bahin, nanawagan si Mandaue City Mayor Glenn Bercede sa mga tinugyanan sa balaod sa pagsiguro nga kining mga delikadong materyales dili moagi o mabutang sa peligro sa ilang dakbayan.
Matod ni Bercede nga bisan og wala maapil sa operasyon ang Mandaue City, nagpabilin kining gikabalak-an tungod sa kaduol sa Cebu City ug Talisay City.
Giawhag niya ang mga ahensya nga nagpatuman sa balaod nga maghimo usa ka hingpit nga imbestigasyon aron mahibal-an kung giunsa ang pagsulod sa uranium sa rehiyon ug pagsiguro sa husto nga pagpugong niini.
