Pakyas ang European powerhouse nga Netherlands sa pagpreserbar sa ilang kadaugan human kaduha silang naabtan sa Japan, nga misangpot sa 2-2 nga tabla sa ilang kulbahinam nga FIFA World Cup 2026 group-stage match kaganihang alas-6:00 sa buntag (oras sa Pilipinas) sa Dallas Stadium sa Arlington, Texas.
Unang mibuak sa kalisod ang Netherlands sa ika-51 nga minuto pinaagi sa kusog nga header gikan kang Virgil van Dijk.
Apan wala magpalupig ang Japan human daling nakatubag si Keito Nakamura paglabay lang sa unom ka minuto aron mapatas ang iskor sa 1-1.
Misulay pag-usab sa pag-angkon sa tibuok tulo ka puntos ang Dutch side sa dihang nakapuntos si Crysencio Summerville sa ika-64 nga minuto, nga naghatag kanila og 2-1 nga bentaha.
Apan sa dihang daw sigurado na ang kadaugan alang sa Netherlands ug nagsugod na ang selebrasyon sa ilang mga fans, gipahilom kini ni Daichi Kamada pinaagi sa usa ka critical equalizer sa ika-89 nga minuto, nga nakahatag sa Japan sa mahinungdanong pampatabla nga puntos.
Kahinumduman nga upat ka tuig ang milabay, ang Japan nahimong usa sa pinakadakong “dark horse” sa 2022 FIFA World Cup human nilang mapildi ang mga football powerhouse sama sa Spain ug Germany sa group stage, sa wala pa sila mapalagpot sa Croatia pinaagi sa penalty shootout sa Round of 16.
Tungod sa maong resulta, misamot ang presyur sa duha ka koponan sa ilang umaabot nga mga duwa karong Domingo (oras sa Pilipinas), diin mag-atubang ang Netherlands ug Sweden alang sa Group F, samtang makigsangka usab ang Japan batok sa Tunisia sa laing mahinungdanong engkwentro.
