CEBU CITY-Mabulukon nga nahuman ang gipahigayon nga New Year’s countdown sa Plaza Independencia diin gipangulohan sa kagamhanan sa dakbayan sa Sugbo.
Nagmalampuson kini tungod usab sa hugot nga gipatuman sa seguridad sa gipakatap nga kapin 300 ka mga sakop sa kapulisan ug force multipliers aron masiguro ang kaluwasan sa mga misaksi ug miduyog sa gihalad nga pasundayag.
Atol sa pakighinabi sa Bombo Radyo Cebu kang Police Col. Antonietto Cañete, ang City Director sa Cebu City Police Office nga epektibo ang ilang gihimo nga pagpangandam gumikan nahuman nga malinawon ug hapsay ang gipahigayon nga countdown ug Sinulog kick off.
Sa pikas bahin, gihatagan usab og gihimug-aton ni Cebu City Mayor Raymond Garcia sa iyang giluwat nga mensahe atol sa pasundayag diin pinaagi sa maayong pagdumala ug pagpangulo nga gipalihok sa aksyon, inubanan sa usa ka pasalig sa diplomasya ug pagtinabangay, daghan ang mahimo niini alang sa kalambuan sa syudad.
Gikan sa pagpalagsik sa mga palisiya sa pagpadayon sa kasyudaran ngadto sa paghatag og gahum sa Micro, Small and Medium Enterprises, gikan sa pagsiguro sa mas luwas nga mga komunidad pinaagi sa mga programa sama sa RSP-BIDA ngadto sa pagpalambo sa inclusivity uban sa mga inisyatibo sama sa Paleng-QR Ph program, ngadto sa malampuson nga pag-host sa Palarong Pambansa, ug ang labing gipaabot nga paglusad sa ang Carbon Tourism Zone.
Mibarog ang dakbayan sa Sugbo isip usa ka timaan sa kauswagan ug kalig-on hinungdan nga gidasig niini nga mag-uban ang tanan aron pamatud-an nga walay problema nga dili mabuntog kung trabahuon isip usa.
Ingon man nga gipasiugda niini nga sa pagtak-op ning tuiga kay ang pag-abiabi sa bag-ong tuig ug ang pagsugod sa Sinulog 2025.
