CEBU CITY-Nabalhog na sa prisohan ang usa ka babae ug ang iyang kabit human kini maatlan sa mga kapulisan nga padulong na unta magsawo sa lawasnong kalipay sa may Brgy. Tayud, Liloan, Cebu.
Ang babae, 38 anyos ug residente ra usab sa maong dapit samtang ang iyang gika iring-iring usa ka 34 anyos nga residente sa Brgy. Talamban Cebu City.
Matud ni Police Master Sargeant Jason Gayo, ang desk officer sa Liloan PS nga personal nga midangop sa ilang estasyon ang bana sa maong babae para magpauban sa ilang balay.
Una niini, nagduda na matud pa ang bana sa iyang asawa nga naa kini lain sanglit usa man kini ka OFW sa United Arab Emirates.
Nagpaka-aron ingnon matud pa ang bana nga mubalik na sa gawas sa nasud ug gihatud usab kini sa asawa sa airport.
5 ka adlaw matud pa kini nga nagtago-tago ug naniid sa iyang asawa. Sa dihang nasakpan na niini ang kabit sa iyang asawa nga miadto sa ilang balay, dali kini nga nagpatabang sa mga kapulisan.
Naatlan gyud sa mga pulis ang duha sa kwarto nga nagdulog na. Diha-diha dayon gisikop ang duha.
Kasong adultery ang atubangon sa babae ug sa iyang kabit.
