CEBU PROVINCE-Nauyonan sa mga mayor ug ni Cebu Provincial Governor Gwendolyn Garcia nga tangtangon na ang paglakip sa online vote sa pag-kwenta sa mga mananaog sa nakalabay nga Pasigarbo sa Sugbo 2023.
Kini ang nasabotan atol sa meeting nga gipatawag ni Governor Garcia sa Capitol Social Hall kagahapong adlawa, Agosto 30.
Hinuon ang lungsod nga nakakuha og labing taas nga boto kay aduna sa gihapo’y makuha nga special award.
Sukwahi sa naandan nga Top 10, kay Top 15 na ang i-anunsyo nga mananaog sa Grand Ritual Showdown.
Inay nga Top 1 kay Top 5 na ang pili-on nga mananaog sa introduction video sa mga mayor ug Top 5 sa gihapon ang pili-on sa Festival Queen 2023, samtang Top 5 ang pili-on sa audio van.
Sa iyahang bahin, mipahibalo si Garcia nga mihatag si President Ferdinand Marcos, Jr. og P1 million isip dugang premyo sa mga mananaog.
Apan gumikan sa gipakita nga pag-level up sa mga LGUs mi-desidir ang gobernador nga tunga-on na lang ang premyo sa 50 ka mga mayor.
Laing P1 million usab ang gisaad ni Garcia isip pasalamat sa padayon nga kahi-usahan nunot sa kontrobersyal nga Pasigarbo sa Sugbo 2023 competition.
Sa laing bahin, ang mga mayor gikan sa kontrobersyal nga mga dakbayan kinsang top performers sa Pasigarbo, ang dakbayan sa Carcar ug dakbayan sa Toledo, kauban usab ang mayor sa lungsod sa Minglanilla, ang nagpakita sa ilahang panaghi-usa taliwa sa makabungog nga panagbangi sa mga supporters sa social media.
Alang usab kang Carcar City Mayor Mario Patricio Barcenas, pareho lang ang tanan nga ubos sa One Cebu, hayan angayan lang nga dawaton ang mga desisyon alang usab sa katawhan sa tagsa-tagsa ka mga LGUs sa probinsiya, arun usab nga ‘steady’ ug mapadayon ang panaghi-usa.
Karung umaabot nga Setyembre 6, 2023 ang pag-anunsyo sa mga bag-ong mananaog diin mao na usab kini ang awarding ceremony.
