Gitaho sa Commission on Audit (COA) nga ang Office of the President (OP) kay migasto og kapin sa P2.2 bilyones sa confidential funds (CF) niadtong 2023 sama niadtong 2022.
Basi sa 2023 audit report, gipasabot sa COA nga ang maong kantidad sa CF ubos sa OP gigamit alang sa mga galastohan nga may kalabotan sa surveillance activities sa mga ahensya sa gobyernong sibilyan aron suportahan ang mandato o operasyon.
Gawas niini, ang OP migasto og P2.3 bilyones sa intelligence fund nga gigamit alang sa mga galastuhan nga may kalabotan sa intelligence information gathering activities sa uniformed ug military personnel, ug intelligence practitioners nga adunay direktang epekto sa nasudnong seguridad.
Migasto usab ang OP og kapin sa P10 milyones alang sa extraordinary ug miscellaneous nga mga galastuhan nga gigamit sa pag-ila sa kantidad nga gibayad alang sa mga galastuhan nga may kalabotan sa paghimo sa opisyal nga katungdanan.
Sa kinatibuk-an, ang OP migasto og P4.57 bilyones sa confidential, intelligence, ug extraordinary expenses niadtong 2023. Mas taas kini kon itandi sa P4.50 bilyon nga natala niadtong 2022.
