Hugot nang gibantayan sa Philippine Drug Enforcement Agency (PDEA)-7 ang pagkuyanap sa party drugs subay na sa mga parties atol sa Sinulog sa Sugbo.
Gilusad na sa nahisgutang ahensya ang “Oplan Ecsta-NO” ilabi na nga daghan ang magpahigayon ug party sa mga nagkadaiyang party places lakip na ang mga bar.
Gipahibalo ni PDEA 7 Regional Director Wardley Getalla nga gawas sa mga ‘party places’, hugot usab nila nga bantayan ang mga airports ug seaports diin posibling makasulod ang mga party drugs.
Matud ni Getalla nga magpahigayon sila ug ‘random checking’ sa mga tugpahanan, pantalan ug uban pang mga area.
Ang Oplan Ecsta-NO sa PDEA 7 adunay koordinasyon sa uban pang government agencies sama na lang sa Philippine National Police, Armed Forces of the Philippines, Philippine Coast Guard, Bureau of Fire Protection, ingon man ang Department of Social Welfare and Development.
Gisiguro usab ni Getalla ang zero casualty alang sa mga drug-related incidents ning tuiga.
Kahinumdumang namatay ang 19-anyos nga si Ashley Abad sa usa ka Sinulog party niadtong 2019 human nga gikatahong na-overdose party drug.
