Aprobado na ang gisugyot nga P1.7-bilyones nga education budget sa Kagamhanang Lalawigan sa Sugbo atol sa ilang unang Provincial School Board (PSB) meeting karong tuiga.
Ang PSB kay gipangulohan ni Cebu Provincial Governor Pamela “Pam” Baricuatro sa tinguha sa iyang administrasyon nga magtagana og pundo para sa mga priority programs ug infrastructure sa mga tunghaan sa probinsya.
Nanukad gikan sa Special Education Fund (SEF) ang maong pundo diin magsuporta kini sa mga inisyatiba sa pagsulbad sa mga suliran sama sa kakuwang sa mga lawak, pagpabaskog sa mga learning resources, ug pagpalapad sa mga oportunidad para sa mga Sugboanong tinun-an.
Lakip sa major allocations kay ang P700-milyones nga proyektong pagpatukod sa mga smart classrooms sa pag-reinforce niini sa moderno ug technology-enabled learning environments. Laing gigahinan kay ang P295.9-milyones para sa pagpatukod og Temporary Learning Shelters (TLS) aron daling ilisan ang mga delikado ug risgong mga lawak nga nauyog niadtong Sept. 2025 Earthquake samtang nagpaabot sa permanenteng rehabilitasyon.
Gikumpirmar sab sa Department of Education – Central Visayas (DepEd-7) nga adunay 269 damaged classrooms human sa mga katalagman nga miigo sa Sugbo nga mitakdo sa report gikan sa Capitol Post Disaster Needs Assessment (PDANA).
Lain mga investments niini kay ang musunod:
-P335.9-milyones para sa mga school supplies, instructional materials, ug ubang gikinahanglang sa mga tinun-an sa Kindergarten hangtod sa Grade 12;
-P13-milyones para sa pagpamalit og armchairs;
-P10-milyones para sa sports equipments nga magsuporta sa student development ug athletics;
-P3.48-milyones para sa early childhood education sa probisyon sa mga ukelele
-P30-milyones para sa learning materials ubos sa literacy nad numeracy recovery programs;
-Ug pundo para sa teacher and personnel training, educational research, ug school governance support
Nagpakita kini sa ligdong nga pagtuman sa pasalig nga palambuon ang kalidad sa edukasyon sa probinsya.
