CEBU – Mokabat sa P13.6 milyones nga kantidad sa gituohang shabu ang nasakmit atol sa buy-bust operation sa Barangay Biasong, dakbayan sa Talisay niadtong Biyernes sa hapon, Agosto 26, 2022.
Gawas niini, nasikop usab sa kapulisan sa dakbayan sa Talisay si Albert Guia, 32, ug tulo ka menor de edad ang naluwas atol sa operasyon.
Giingong gigamit isip drug courier ang tulo ka 15-anyos nga mga batang lalaki, kinsa gihulagway sa kapulisan nga giingong mga kauban ni Guia, nga taga lungsod sa Loon, probinsiya sa Bohol.
Nasayran nga wala permanenteng pinuy-anan si Guia ug temporaryo lang kini nga nagpuyo sa Barangay Maribago, dakbayan sa Lapu-Lapu.
Samtang, gibutyag ni Police Major Joey Bicoy, hepe sa Cebu Police Provincial Office’s Intelligence and Drug Enforcement Units, nga gikan sa Barangay Calamba, dakbayan sa Sugbo ang tulo ka mga menor de edad.
Nasakmit sa kapulisan gikan sa mga suspek ang duha ka kilo sa gituohang shabu nga mobalor og P13.6 milyones.
Gidugang ni Bicoy nga gibayaran ang maong mga menor de edad og P1,000 ngadto sa P2,000 sa matag malampusong paghatod sa ilegal nga drugas ngadto sa mga kustomer.
