CEBU CITY-Mukabat sa P14.7 million ang shabu nga mitimbang ug 2 ka kilo diin nasakmit gikan sa duha ka mga lalaki atol sa buy-bust operation sa dalan B. Aranas, Barangay San Nicolas Proper, dakbayan sa Sugbo.
Giila ang mga dinakpan nga sila si Aljan Mijares Langga, 20 anyos, nagpuyo sa Barangay Mambaling apan nag-board sa Barangay San Nicolas, ug giingong kauban niini nga si Hardy Paquite, 41 anyos, nga taga Barangay Cogon Pardo.
Ang maong operasyon ang gihimo sa mga sakop sa Regional Drug Enforcement Unit ug sa Philippine Drug Enforcement Agency sa Central Visayas.
Gipahibalo sa mga operatiba nga mitumaw ang ngalan sa mga dinakpan basi sa ilahang nakuha nga impormasyon sa mga nakalabay nga operasyon.
Nasayran nga maka-dispose si Langga ug usa ka kilo nga shabu sulod sa usa ka semana ngadto sa iyahang mga kliyente sa dakbayan sa Sugbo apan mahimo usab nga makahatud sa laing dapit kung hangyu-on sa iyahang amo.
Gitanggong ang mga dinakpan sa RPDEU-7 alang sa mga ‘documentary purposes’ ug i-turnover lang usab kini sa Sawang Police Station diin sila prisohon.
