Cebu City-Giduso karun sa lokal nga kagamahanan sa Probinsya sa Sugbo ang P23-billion budget alang sa sunod tuig 2024.
Kini nunot sa panagtapok nga gihimo adlaw nga Martes, Nobiyembre 7, 2023, sa mga sakop sa Cebu Provincial Board (PB) ug nagkalain-laing department head sa Kapitolyo, sa conference room sa Bise Gobernador alang sa deliberasyon sa gisugyot nga P23-bilyones nga budget alang sa 2024 sa Cebu Provincial Government.
Mao kini ang gibutyag ni Provincial Board Member Glenn Anthony Soco, ang pangu sa Committee on Budget and Appropriations, nga mao usab ang nangulo sa maong budget hearing ug deliberation.
Matod pa nga dayag nga mas taas ang proposed budget para sa 2024 og 14.14 percent gikan sa P20.15 billion budget karong tuiga, 2023.
Gibutyag ni Soco nga karung umaabot nga Lunes, Nobyembre 13, posibli nga masumiter na nila ang committee report.
Dugang sa opisyal nga aduna silay gisubay nga tukmang proseso sa maong sugyot kung diin, kung ugaling man nga walay mga pag-kwestyon o bisan unsa nga kausaban, mamahimong malampuson ang ilahang pagduso sa nahisgutang tinuig nga budget para sa sunod tuig.
Subay sa maong balita, ang naasoy nga budget hearing kabahin sa “requisite” sa dili pa ang katapusang pag-apruba sa gisugyot nga tinuig nga budget, diin ang matag department head adunay kahigayonan sa pagdepensa sa ilang gipangayo nga budget atubangan sa legislative body.
Hinuon gitino ni Soco nga na-kumpleto na nila ang gikinahanglang dokumento ug ingon man nga hugot nga gitutokan ang pipila ka mga detalye sama nalang sa mga funding sources sa proposed 2024 budget.
