Gibana-bana nga P240.6 milyon nga kantidad sa ilegal nga sigarilyo nga nasakmit sa Bureau of Internal Revenue ug mga law enforcement unit ang gikupog sa usa ka bodega sa North Reclamation Area, Mandaue City, niadtong Huwebes, Agosto 13.
Ang pagkupog sa mga sigarilyo gipangulohan ni Department of Finance Secretary Frederick Go, BIR Central Visayas Director Douglas Rufino, ug Bureau of Customs Port of Cebu District Collector Atty. Zsae Carrie De Guzman.
Matud ni Dir. Rufino miingon nga pito ka mga indibidwal nga giingong nalambigit sa pagbaligya, paghatud, ug paghimo sa ilegal nga sigarilyo ang nadakpan ug gikasuhan ubos sa Republic Act 10863, o ang Customs Modernization and Tariff Act.
Sigon usab ni Sec. Go nga ang mga sigarilyo nga walay buhis mahimong makapakunhod sa kita sa gobyerno nga gituyo alang sa mga programa ug serbisyo publiko.
Gihimug-atan usab niini nga gawas sa pagkolekta sa buhis niini alang sa serbisyo publiko, ila kining gigukod gumikan kay makadaot ang sigarilyo ug makahatag ug risgo sa kinabuhi sa taw.
Samtang, ang mga awtoridad nag-imbestigar sa tinubdan sa mga raw materials nga giingong gigamit sa paghimo sa ilegal nga sigarilyo ug nagpalig-on sa pagmonitor sa mga pantalan sa Cebu.
Sigon ni De Guzman, nga 11 ka container van nga adunay sulod nga nasakmit nga smuggled nga sigarilyo ang gipaubos pa sa legal nga proseso ug wala pa gikupog.
Ang mga opisyal sa BOC miingon nga ang mga kargamento mahimong mokantidad og binilyon ka pesos.
