MANDAUE CITY-Gisupak sa mga sakop sa ‘Save Mandaue Coalition’ (SMC) ang P3 bilyones nga DBP loan sa Mandaue City nga gitumong sa pagpundo sa bag-ong government center sa kanhi Cebu International Convention Center (CICC) site.
Atol sa press conference, ang grupo nakiglalis batok sa loan agreement sa siyudad, nga nagpasiugda hinuon sa Public-Private Partnership (PPP), nga ilang giangkon nga wala’y bayad sa siyudad ug makalikay sa pagpabug-at sa mga magbubuhis.
Nagtuo sila nga ang substantial financial commitment kay nasayop ug wala makatubag sa labing dinalian nga mga isyu nga giatubang sa komunidad.
Nagkanayon si Elaine Joyce Bacunador, ang tigpamaba sa SMC nga mas maayo ang PPP kaysa sa mangutang ang Mandaue City Govt. tungod sa dako nga interes.
Gihatagan og gibug-aton sa SMC nga dili sila supak sa pagtukod sa bag-ong city hall apan nabalaka sila sa pinansyal nga epekto sa utang.
Plano sa dakbayan nga tukoron ang government center aron masentralisar ang serbisyo sa mga buhatan sa lokal nga kagamhanan ug nasudnong ahensya, aron mas sayon alang sa mga residente.
Apan, ang grupo nangatarungan nga ang pagpatuman sa PPP isip usa ka dugay ug konkretong solusyon makatabang sa pagsulbad sa mga dinalian nga isyu nga giatubang sa mga Mandauehanon.
Namatikdan usab nila nga ang PPP mahimong makapalambo sa pagtubo sa ekonomiya pinaagi sa paghimo og daghang mga oportunidad sa trabaho ug pagdasig sa mga pamuhunan sa imprastraktura ug serbisyo.
Gani, gitumbok sa grupo ang Mactan-Cebu International Airport ug ang Cebu-Cordova Expressway (CCLEX) isip mga ehemplo sa malampusong mga proyekto sa PPP.
