Niapod-apod og kapin sa P4.1 milyones nga humanitarian assistance sa mga pamilyang naapektuhan sa kadaot nga gipahinabo sa Bagyong “Crising” ang Department of Social Welfare and Development (DSWD).
Sa press briefing niadtong Sabado, Hulyo 19, ang tigpamaba sa DSWD nga si Irene Dumlao mitaho nga ang mga apektadong pamilya gihatagan og pasiunang tabang nga gilangkuban sa family food packs ug non-food items.
Base sa datus sa ahensya ug Office of the Civil Defense (OCD) kagahapong adlawa, kapin sa 68,000 ka pamilya nga gilangkuban sa 215,000 ka indibidwal ang naapektuhan sa bagyo sa Ilocos Region, Cagayan Valley, Central Luzon, MIMAROPA, Bicol Region, Western Visayas, Central Visayas ug Zamboanga Peninsula.
Sa pagkakaron, niabot na sa 5,400 ka mga indibidwal ang gipabakwit sa mga evacuation centers.
Samtang, matod ni ASec. Dumlao, ang ilang field offices ug quick response teams padayong nagmonitor sa sitwasyon sa mga lugar nga naigo sa bagyo.
Matod niya nga gipakatap sila aron makig-alayon sa mga local government units ug mohatag sa gikinahanglang tabang sa mga biktima.
