Milapas na sa P5.5 bilyon ang kinatibuk-ang kantidad sa kadaot sa sektor sa agrikultura sa tibuok nasud tungod sa grabeng epekto sa El Niño.
Base sa pinakabag-ong datos sa National Disaster Risk Reduction and Management Council o NDRRMC, kapin 201,000 ka mag-uuma ug mangingisda ang direktang naapektuhan ug nawad-an sa pangunang panginabuhian.
Labing grabeng naigo sa hulaw ang Region 2, gisundan sa CALABARZON, Region 5, Region 9, Region 11, Region 12 ug CARAGA.
Samtang, mokabat sa 388,375 ka indibidwal o 104,149 ka pamilya ang naapektuhan sa nagpadayon nga epekto sa El Niño.
Tungod sa dakong epekto niini sa panginabuhian ug suplay sa pagkaon, 106 ka siyudad ug lungsod sa tibuok nasud ang gibutang ubos sa state of calamity.
Pinakadaghan niini anaa sa Region 2, diin 66 ka lokal nga gobyerno ang nagdeklarar og state of calamity.
Samtang, kapin P39 milyon nga tabang ug ayuda ang nahatag na sa nasudnong gobyerno ngadto sa mga apektadong pamilya.
