Gipagamay ni US President Donald Trump ang mga taho nga nag-ingon nga naghatag ang pipila ka entidad sa China og mga satellite image sa usa ka militar nga base sa Jordan ngadto sa Iran, diin tulo ka sundalong Amerikano ang namatay sa usa ka pag-atake.
Sumala ni Trump, ang pagpangespiya sa China usa lamang ka normal nga kalihokan sa paniktik tungod kay ang Estados Unidos naghimo man usab sa ingon batok sa Beijing. Matud niya, managpareho ra ang gihimo sa duha ka nasod bahin sa intelligence gathering.
Ang maong insidente gilauman nga mas makapataas sa tensyon tali sa Washington ug Beijing sa dili pa ang gitakdang pagbisita ni Chinese President Xi Jinping sa White House karong Septiyembre 24, diin nagsugod ang maong isyu human gipusil sa Iran ang Muwaffaq Salti Air Base sa Jordan niadtong Hulyo 17.
Wala hinuon gipangalanan sa mga opisyal sa Estados Unidos ang mga kumpanya sa China nga nalambigit, ug wala usab nila gidirekta ang basol sa gobyerno sa Beijing. Nangayo usab og ebidensya ang China ug gihimakak niini nga adunay kumpanya sa ilang nasod nga naghatag og mga satellite image sa Tehran.
Bisan pa sa mga sanksyon nga gipahamtang sa Washington batok sa tulo ka kumpanya sa China kaniadtong Mayo ug sa pagdili sa pagsulod sa mga sakyanang gikan sa China pinaagi sa taas nga tariff, gipahayag ni Trump nga nagpabilin nga maayo ang gipakita nga gawi sa duha ka nasod.
