Gipahayag ni Atty. Rameses Victorius Gatchalian Villagonzalo, usa ka ICC Accredited Lawyer, sa Bombo Radyo Cebu nga ang gipahigayon nga pagbutyag sa mga ngalan sa nakadawat og reward money o pondo sa gobyerno kinahanglan gayod nga beripikahon pinaagi sa pagsusi sa mga katuhoang dokumento.
Gipasabot niya nga importante nga mapamatud-an ang tinuod nga identidad sa mga tawo nga nahisgutan, sama nila ni Mary Grace Piattos ug Kathy Ting, ug kung sila ba gyud ang nag-organisa sa paniktik nga nagmando sa pagbayad.
Dugang pa niya, adunay gitipigan nga master list sa mga intelligence agents, spies, o contractual employees sa gobyerno, ug ang Office of the President ra ang bugtong makahatag og pormal nga go signal o order aron pormal nga ibutyag ug maablihan ang ilang tinuod nga identidad kon gikinahanglan sa sitwasyon.
Gipahayag usab ni Villagonzalo, nga ang Commission on Audit (COA) kasagaran ra nga nagasaysay o nagadawat sa pampublikong pondo base sa pagkakompleto sa gipresentar nga mga dokumento.
Apan gipasabot niya nga dili kini igo tungod kay ang mga auditor dili mga eksperto sa counter-intelligence aron masusi kon tinuod ba o hinimo-himo ra ang mga ngalan, pirma, ug kantidad sa mga resibo.
Gihatagan usab niya og katin-awan nga kon kulang sa pag-imbestigar o pag-beripikar ug adunay mga pagkabalda o lapses sa proseso, dali ra kaayo nga mailad ang sistema ug ang gobyerno ang kanunay nga malugi.
Tungod niini, gituldokan niya nga kinahanglan adunay pormal nga counter-intelligence mechanism o espesyal nga kahanas ang COA aron masusi kon tinuod ba gayod nga nag-render og intelligence work ang mga tawong gipangbayaran ug malikayan ang mga buho o loopholes sa paggamit sa intelligence fund.
