Kinahanglang pinasubay sa doktrina sa Qur’an ang pagpangandam sa pagkaon alang sa mga atleta sa 30th Southeast Asian Games gikan sa source hangtud na sa la mesa.
Kini ang nahimong reaksyon ni Ustadz Najeeb Razul, usa ka mufti ug Islam expert sa Central Visayas, subay na sa pagpangandam og mga “halal” foods alang sa mga delegado sa biennial sports meet sa Southeast Asia.
Kahinumduman nga mipadayag ang National Commission on Muslim Filipinos (NCMF) nga giingong gi-ignore sa mga SEA Games Organizers ang hangyo nga mag-serve og halal foods sa mga atleta, ilabi na ang mga gikan sa Islamic countries.
Gipasabot ni Razul nga kinahanglan hinlo ang pag-ihaw, pagpangandam, ug hangtud na sa pag-serve sa pagkaon.
Kung hugaw ug adunay dugo ang maong pagkaon, usa kini ka “haram” o bawal.
Matud sa Islam leader sa Sugbo nga strikto kaayo ang uban pang mga Islamic countries sa maong rehiyon ilabi na kung pagtulun-an sa Quran, ang balaang kasulatan sa Islam, maoy hisgutan.
Misugyot si Razul nga maayo unta nga magpahigayon og consultation ang SEA Games organizers ngadto sa Muslim community aron masayran kung unsa man ang angayang kan-on sa mga SEA Game athletes gikan sa mga Islamic countries.
