Nabanhaw ang panawagan nga i-deport o i-repatriate sa China ang mga kawani ug Ambassador sa Chinese Embassy nga nakabase sa Pilipinas nunot sa grabeng insidente sa Ayungin shoal niadtong Hunyo 17 ning tuiga.
Matod sa eksperto sa maritime law nga si Dr. Jay Batongbacal, wala nila tumana ang ilang katungdanan sa pagpalig-on sa diplomatikong relasyon.
Dugang pa, nga ang Chinese Embassy wala motabang sa pagsulbad sa nagpadayong mga isyu nga may kalabotan sa West Philippine Sea nga naa sa exclusive economic zone sa Pilipinas.
Gitataw sa opisyal nga bisan og grabe ang nahitabo human maputol ang tudlo sa usa sa mga tropa sa nasud, dili kini rason sa gubat ug kinahanglang sulbaron kini pinaagi sa diplomasya ug malinawon nga paagi.
Sa pagkakaron, ang Chinese Ambassador to the Philippines mao si Huang Xilian, kinsa girekomendar kaniadto sa daghang mga Senador nga pabalikon sa China tungod sa balikbalik nga agresibong aksyon sa China sa WPS, apil na ang pagpamomba sa mga barko gamit ang water cannon sa PH.
Apan daan nang niingon si Presidente Ferdinand Marcos Jr. nga dili na kinahanglan nga palagputon si Huang kay bisan og ilisan pa siya og bag-ong envoy, padayong ibutyag ang narrative o posisyon sa China kung hisgutan ang mga isyu sa gilalisan nga kadagatan.
