CEBU CITY — Nimando si Cebu City Mayor Edgardo Labella nga gidili na ang pagpanaygon sa tanang kadalanan sa dakbayan sa Sugbo sugod karon adlawa.
Ubos sa giluwatan niining Executive Order No. 104, lakip usab sa mga gidili mao ang pagpanagyon o caroling sa sulod o gawas sa mga pangpubliko nga sakyanan, mga edipisyo, ug mga kabalayan samtang gipa-ubos pa sa community quarantine ang tibuok syudad.
Matud ni Labella nga nagpabilin pa ang hulga sa coronavirus kung diin kini ang mamahimong hinungdan sa pagkuyanap sa COVID-19 tungod magsuroy-suroy ang mga nag-caroling sa mga lugar.
Nihangyo kini sa publiko ilabi na sa mga nag-caroling og pagsabot arun malikayan ang pagkayunap sa makamatay nga kagaw.
Gitahasan ni Mayor Labella ang mga kapulisan ug ang PROBE Team nga ipatuman kining bag-ong mando nga maoy mamadlong sa mga nilapas aning lagda.
‘Walay Christmas party sa City Hall’
Samtang gikumpirmar usab sa mayor nga walay ipahigayong christmas party alang sa mga empleyado sa City Hall.
Kini isip pagsimpatiya usab sa mga nakasinati og kalisud gumikan sa COVID-19 crisis.
Dugang pa niini nga gidili sa gihapon ang mga mass gatherings aron dili mosangput sa subling pagkuyanap sa COVID-19. (ekp/gn)
