CEBU CITY-Gisugdan na sa mga lokal nga kagamhanan sa syudad sa Sugbo ang pagpangandam sa mga venues alang sa nagkadaiyang sports events sa Palarong Pambansa sunod tuig, kung diin nakadaog kini sa hosting bid batok sa mga probinsya sa Negros Occidental ug Antique.
Mao kini ang gibutyag sa pango sa Cebu City Sports Commission nga si John Pages.
Nasayran nga naa sa 12,000 ka mga atleta ingon man opisyales ang muabot sa Dakbayan kinsang musalmot sa 27 ka mga sports games nga ipahigayon sa 30 ka venues.
Gipanglantawan usab nga 20 ka tunghaan sa Dakbayan ang magsilbing billeting quarters sa mga atleta, coaches, ug ingon man opisyales.
Dugang sa pango sa Sports Commission sa syudad sa Sugbo, nga maingon nga usa ka sikit nga away ang nahitabong hosting bid tali sa mga naasoy nga mga probinsya sa Visayas apan gikalipay ni Pages ang pagtanyag sa syudad sa Sugbo isip host sa Palarong Pambansa 2024 sanglit mao kini ang pinakadako nga sports event sa tibuok nasud.
Gibutyag usab ni Pages nga hingpit ang pagpangandam nila sa umaabot nga sports event, gani 11 ka bulan pa lang sa dili pa ang palaro ug bisan wala pa opisyal nga gi-anunsyo nga ang ang Dakbayan mao ang mag-host sa Palarong Pambansa 2024, nagsugod na kini sa pagpangandam sama nalang sa pagsirado sa Abellana Sports Complex alang sa pag-renovate sa swimming pool ug oval niini ingon man ang pag-identify ug pag-lista sa mga posibli nga playing venues ug headquarters.
