Nagpasidaan si Atty. Kristina Conti, Assistant to Counsel, nga ang nagpadayong mga hulga ug pagpanghadlok gikan sa mga dumadapig ni kanhi Presidente Rodrigo Duterte batok sa International Criminal Court (ICC) nahimo na hinuong ebidensya sa prosekusyon, nga ilahang gigamit aron babagan ang bisan unsang hangyo alang sa temporaryong kagawasan ni Duterte.
Sumala pa kaniya, dili na sila manghilabot sa mga sipyat o kapakyasan sa kampo sa depensa.
Gipasiugda ni Conti nga ang balik-balik nga paglimod sa legalidad sa ICC nakapahait ug nakapalig-on lamang sa argumento sa prosekusyon.
Kahinumduman nga niadtong Abril 23, 2026, gikumpirma sa ICC ang tulo ka mga kaso sa krimen batok sa katawhan o crimes against humanity batok kang Duterte may kalabotan sa liboan ka mga pagpatay ubos sa “war on drugs.”
Kung diin, ang husay gikatakda nga magsugod tali sa Oktubre 2026 ug Pebrero 2027.
Bisan pa sa pag-resign sa duha ka nag-unang abogado ni Duterte ug ang pag-ilis sa iyang mga depensa, miinsistir si Conti nga dili kini makapahuyang sa kalig-on sa ebidensya batok sa kanhi presidente.
Ang kampo sa mga biktima nagpabiling lig-on sa ilang tinguha nga makab-ot ang hustisya, samtang nagtan-aw nga ang mga pahayag sa mga dumadapig ni Duterte nagsilbi hinuon nga “bala” sa prosekusyon sa ICC.
