Cebu City-Gitutokan sa lokal nga kagamhanan ang pagbaha sa dakbayan kauban ang Department of Public Works and Highways (DPWH 7), sama nalang sa pag de-clog sa mga drainage sa syudad isip short-term solution sa maong problema apan matod sa lokal nga opisyales, gikinahanglan ang dugang koordinasyon ug kooperasyon aron matubag ang problema sa baha aron makab-ot ang long-term solution sa maong problema.
Gibutyag ni City Planning Officer Joseph Michael “Yumi” Espina nga nagmugna sa kasamtangan ang Cebu City og mga long-term solutions sa problema sa baha.
Matud niini nga naghimo ang ilahang kagamhanan og mga long-term nga mga solusyon hilabi na sa mga ‘downtown area’, sa makasaysayanong distrito.
Gibutyag usab ni Espina nga ang Cebu Bus Rapid Transit (CBRT) adunay urban enhancement project nga motubag usab sa mga sidewalk, bike lanes, ug lakip na ang drainage system.
Sa gipahigayon nga ‘meeting’ naghinaot si Espina nga makita ang kauswagan ug paglihok sa ‘drainage project’ human nga moagi kini sa upat ka ahensya.
Ang upat ka ahensya mao ang Cebu City’s Department of Engineering and Public Works (DEPW), DPWH 7, DPWH Cebu City District Engineering Office District, ug ang City Planning and Development Office.
Samtang, nagpadayon ang pagtrabaho sa Package 1 sa CBRT project nga magmugna sa imprastraktura sa BRT nga anaay 2.38 ka kilometro gikan sa Cebu South Bus Terminal sa N. Bacalso Ave hangtod sa Osmeña Blvd. adto sa Cebu Provincial Capitol.
Atol sa press conference, ang Cebu City’s Task Force (TF) Gubat sa Baha (War against Flooding) sa Dakbayan sa Sugbo nihatag og update sa ilahang gihimo arun maminusan ang mga pagbaha sa Sugbo.
Gitataw usab sa representante sa Task Force (TF) Gubat sa Baha nga si Colonel Jefferson Omandam, niingon nga padayon nilang gi-declogging ug gi-dredge ang mga lugar nga daling mabahaan sama sa Bonifacio St. sa Barangay Pari-an.
Gihatagan usab og gibug-aton ni Omandam ang kamahinungdanon sa pagpatuman sa kasamtangan nga mga balaod, ilabi na sa paghawan sa ‘three-meter easement zone’ sa mga ubos og baha nga mga dapit sa dakbayan sa Sugbo.
Gikan sa Huwebes hangtod Biyernes, ang DPWH maoy gitahasan sa pagtangtang sa barado sa drainage, samtang ang DEPW maoy mohimo niini sa kataposan sa semana.
Giawhag sa Cebu City Administrator nga si Collin Rosell ang mga residente nga mokooperar sa hustong paglabay sa ilahang mga basura aron dili kini makababag sa mga agianan sa tubig sa dakbayan.
